CEBU, Philippines - Nadawat na sa ginikanan sa usa ka tuig nga bata kinsa namatay human maigo sa saag nga bala didto sa Lipata, lungsod sa Minglanilla ang hinabang pinansiyal gikan sa kagamhanan sa lalawigan sa Sugbo sa miaging adlaw.
Balor og P5 mil nga tseke maoy gitunol sa buhatan ni Gobernador Gwendolyn Garcia pinaagi ni Welson Ramos ang administrative officer sa Provincial Social Welfare Office (PSWDO) ngadto sa mga ginikanan ni Charise Opsima.
Nasayran nga ang biktima didto sa sulod sa ilang balay natulog dihang kalit lang natugpahan sa saag nga bala niadtong Hunyo didto sa barangay Upper Lipata, lungsod sa Minglanilla.
Hangtod karon nagpabiling negatibo ang tanang paningkamot sa kapolisan sa maong lungsod pagtumbok sa tag-iya sa armas kansang bala mikutlo sa kinabuhi sa gamay’ng bata. (Chester Abadilla/WC) - BANAT NEWS