Australiano gipriso kay namun-og sa asawa

CEBU, Philippines - Nagtingkagol sa Talisay City detention cell ang usa ka 64-anyos nga Australian national human kini dakpa sa kapolisan tungod sa pagbun-og niini sa iyang asawa sa ilang balay sa Artville Subdivision, barangay San Isidro, sa maong dakbayan sa miaging Biyernes sa hapon.

Ang suspetsado mao si Albert Latif El-Baba kinsa    gipadakop mismo sa iyang asawa nga si Forieta Quijote El-Baba.

Ang biktima miatubang sa kapolisan sa Talisay City Police Station Women and Children Protection Desk (WCPD) nga nanghuboy ang dagway ug ang lawas sa mga bun-og sa kinumo sa suspek.

Si Inspector Margienette Yosores, hepe sa WCPD mibutyag sa Banat News nga karong Martes pasakaan na nila og kaso ang Australiano.

Matud ni Yosores nga ang nasuk-an sa suspetsado sa iyang asawa mao nga wala dayon niini kuhaa ang gidiling drugas nga gihiposan sa suspek

Ang biktima misumbong usab nga gibaharan siyang patyon sa suspek ug gani may usa ka higayon sa ilang panag-away nga hansakan na unta siya sa kutsilyo ug maayo na lang kay nakalikay siya ug nakadagan.

May higayon usab kuno nga gihan-an na og gulgol sa kutsilyo ang iyang ubol-ubol ug maayo na lang kay wala hingyawai ang maong langyaw.

Tungod sa bahad sa maong Australiano nga patyon na gyud siya kun mosipyat pa, napugos siya sa pagsumbong sa kapolisan niadtong Biyernes ug gipasikop ang suspek.

Matud pa ni Yosores nga gawas sa mga bun-og nabulit pa sa pinaakan ang lawas sa biktima. Niadto pang buwan sa Marso makasal ang maong Australiano ug ang iyang asawa apan matud pa gihimong punching bag niini ang iyang batan-ong asawa. ( /WC) - BANAT NEWS