RDC mihalad og misa nga panamilit

CEBU, Philippines -  Ang Central Visayas Regional Development Council (RDC)7 mihalad og usa ka misa kagahapon isip panamilit kang Secretary Jesse Robredo ug sa Sugbuanong piloto nga si Capt. Jessup Bahinting.

Si Cebu Archbishop Jose Palma ang midumala sa maong misa didto sa Cebu Metropolitan Cathedral.

Si Cebu City Mayor Michael Rama nga maoy chairman sa RDC-7 maoy miawhag sa tanan niyang miyembro nga naglakip sa mga kongresista sa rehiyon 7 sa pagtambong sa maong misa agi’g pagtahod ni Robredo ug Bahinting.

Si Kalihim Robredo giisip sa kadaghanan nga usa ka maayong ehemplo sa maayong panggobyerno ug usab sa maayong pagserbisyo sa katawhan.

Siya maoy giila nga instrumento sa pag-implementar sa maayong mga palisiya sa panggobyerno sa tanang pangulo sa Local Government Units (LGUs) ug usab sa implementasyon sa ubang mga proyekto, programa ug mga kampanya nga paingon sa maayo ug epektibong liderato sa mga lokal nga   opisyales sa kagamhanan 

Samtang si Bahinting nalantawan nga usa ka lokal nga bayani tungod sa pagluwas niini sa kinabuhi ni Cebu City zoo keeper Ronaldo Aventurado kinsa napaakan sa usa ka Philippine Cobra duha na ka semana ang nakalabay.

Si Bahinting nga presidente ug chief executive officer sa Aviatour Air mipalupad sa iyang abyon   aron pagkuha sa tambal nga anti-venom vaccine gikan sa Camiguin nga maoy gidapat kang Aventurado ug misalbar sa kinabuhi niini.

Busa segun sa gisaad ni Mayor Rama nga ang Lifesaver Award itunol unya ngadto sa pamilya ni Bahinting sa selebrasyon sa Cebu City Charter Day sa tuig 2013.

Sa miaging Sabado si Robredo mianhi sa Sugbo sa pagtuman sa duha niya ka speaking engagement sa wala pa siya mobiya paingon sa iyang pinuy-anan sa dakbayan sa Naga apan wala na siya makaabot nga buhi didto kay nahagsa ang gisakyan nilang abyon sa kadagatan sa barangay Obingay, sa dakbayan sa Masbate. ( /WC) - BANAT NEWS