Manager nga gipusil namatay

CEBU, Philippines - Namatay kagahapon sa buntag ang manager sa lending firm nga gipusil didto sa barangay Mantayupan lungsod sa Barili niadtong Biyernes sa alas 2:00 sa kaadlawon.

Ang biktima nga si Sherwin Baricuatro Delos Reyes, 33, minyo, taga barangay Nasipit ug branch manager sa CHN Global Lending Firm nga nagbase sa barangay Poblacion, Barili.

Si PO1 Richard Cababat, imbestigador sa Barili Police Station mibutyag sa Banat News nga ang igsoon sa biktima nga si Sesim Delos Reyes, hingkod ang panuigon maoy mitawag kaniya sa cell phone ug nagpahibawo nga namatay gyud ang biktima alas 7:00 kagahapon sa buntag sulod sa Cebu Doctors Hospital.

Atol sa imbistigasyon nasayran nga ang bitkima gikan nga nakig-inom uban sa iyang barkada ug silingan nga si Gerome Canete ug laing usa ka kauban nga wala makuha ang ngalan.

Apan matud pa, sa ilang pagpamauli si Canete nag-angkas   sa motor sa biktima ug pag-abot sa maong lugar mipaka ang buto sa armas ug ang biktima naagian na lang sa taxi driver nga si Pedro Marie nga nagbuy-od sa dalan busa iyang gihatod sa tambalanan.

Apan si Canete wala na mopatim-aw sa iyang pinuy-anan nga nakapatahap sa kapolisan nga may kasayuran kini sa krimen. (/WC) - BANAT NEWS