Namuyo sa luna sa Kapitolyo interesadong mopalit niini

CEBU, Philippines - Nagkadaghan ang mga residente sa dakbayan sa Sugbo ang nagtinguhang mopalit sa luna nga gipanag-iya sa Kapitolyo nga dugay na nilang gipuy-an.

Kini nasukwahi sa nahaunang taho nga mas pabor ang mga residente sa pagbayloay og luna tali sa kagamhanan sa dakbayan ug lalawigan sa Sugbo gumikan sa giingong kamahal sa presyo sa luna nga dili makaya pagbayad sa mga residente.

Walo ka homeowner’s associations sa upat ka barangay sa dakbayan sa Sugbo ang mipadayag sa ilang tinguhang mapalit ang luna nga ilang gipuy-an atol sa ilang pagpakigtagbo kang Gob. Gwendolyn Garcia.

Kini mao ang Sitio Plaza Mahayahay Homeowners Association ug Rainbow Homeowners Association sa Barangay Apas, Lower Kalunasan Homeowners Association (LOKAHOMA) ug Actual Occupants and Residents of Kalunasan (AOROK) sa Barangay Kalunasan, Pagtambayayong Homeowners Association ug Carcelinian Homeowners Association sa Barangay Tejero ug sa Nivel Hills sa Barangay Lahug mao ang San Isidro Lower View ug Lot 1328 Block 5. Matud pa ni Garcia nga mananghid pa siya sa Hunta Probinsiyal sa Sugbo mahitungod sa pagbaligya sa luna ilabi na nga wala kini malakip sa kanhi nailang Provincial Ordinance 93-1.

Mipasalig hinuon si Bokal Alex Binghay, ang chairman sa committee on properties nga makahangyo ang mga residente sa presyo sanglit lahi kini nga sitwasyon sa 93-1. Magtagbo sila pag-usab karong Martes aron sabotan ang presyo. ( EIM)   - BANAT NEWS