Bayong-bayong gipusil kritikal

CEBU, Philippines - Kritikal ang kondisyon sa usa ka 14-anyos nga bayong-bayong   human kini pusila sa gidudahang tanod didto sa dalan Leon Kilat, barangay Kalubihan, dakbayan sa Sugbo kagahapon sa alas 11:45 sa buntag.

Si SPO4 Alex Dacua sa homicide section sa Cebu City Police Office (CCPO) mibutyag nga ang biktima kinsa nakaangkon og usa ka samad pinusilan sa likod nga bahin sa ulo kansang    bala miungot sa sulod niini, usa ka libudsuroy ug giingong suspetsado sa pagpanguha og mga scrap iron sa maong lugar. Sayo niini ang biktima uban sa laing batan-on nakit-an kini sa gawas nga bahin sa usa ka kan-anan sa maong lugar dihang kalit kining giduol sa usa ka lalaki ug dayon gipusil.

Ang mga higala sa biktima mibutyag nga nagsul-ob og t-shirt nga adunay markang tanod ang namusil kinsa misibat dayon. Padayon pang giimbistigar sa kapolisan ang maong hitabo. ( WC) - BANAT NEWS