CEBU, Philippines - Mikabat sa 1,082 ka hamtong na nga mga punoan sa marijuana ang gipanglarot sa kapolisan didto sa Sitio Panaliwad-on barangay Lawaan siyudad sa Danao sa miaging Huwebes sa buntag.
Matud ni SPO2 Ildefonso Prosia, desk officer sa Danao City Police Station atol sa pakighinabi sa Banat News nga samtang naghatud og warrant of arrest sa usa ka suspetsadong kriminal nga si Alberto Codillo Sr., hingkod , ang kapolisan, maoy ilang nasum-okan ang anihonon na nga plantasyon sa marijuana.
Matud pa ni SPO2 Prosia nga human makasibat ang suspek nga silbihanan unta sa warrant of arrest, padung na nga mamauli sa ilang buhatan ang mga polis dihang nasigpatan nila ang plantasyon sa gidiling mga tanom.
Diha-diha gisugdan dayon og larot sa mga otoridad ang pulos na hamtong nga mga punoan sa marijuana.
Matud pa ni SPO2 Prosia nga nahaponan og inibtanay sa maong mga tanom ang kapolisan ug gihakot kini nila paingon sa ilang buhatan.
Midugang si Prosia nga gawas sa 1,082 ka mga hamtong na nga punoan may linghod pa nga punoan nga lakip nga gipanglarot sa kapolisan nga mikabat sa 627 ka punoan.
Gisusi pa sa kapolisan ang tag-iya sa maong plantasyon sa marijuana. ( /WC) - BANAT NEWS