Sikyu gipusil angol sa giingong kawatan

CEBU, Philippines - Napusilan angol ang usa ka security guard nga nagpatrolya sa palibot sa gibantayan niyang hacienda didto sa barangay Anapog, lungsod sa Asturias kagahapon sa ala 1:00 sa kaadlawon. 

Ang biktima mao si Allan Pascua, 32, ulitawo, lumad nga taga Catarman, Samar ug temporaryong nagpuyo sa barangay Looc, Asturias ug maoy gwardiya sa Asturias Farm Inc. nga gipanag-iya sa pamilyang Chongbian.

Sa paghimo ning balita wala pa matumbok ang ngalan sa kriminal.

Si PO2 Excel Aguanta sa Asturias Police Station mibutyag sa Banat News  nga ang biktima nag- roving sa palibot sa maong farm, gikan   sa Post 5, ug mitabok ngadto sa Post 6, nga nagsakay sa iyang motor.

Matud pa ni PO2 Aguanta nga tungod kay sirado ang gamay’ng gate niini, mihunong ang biktima aron unta kini ablihan.

Apan matud pa wala pa siya makakanaug sa motor   dihang kalit siyang gipusil sa gidudahang kawatan nga nagpahipi sa ngitngit nga bahin sa farm.

Naigo sa ulo apan wala kaayo ma- sentro ang biktima ug nakabawos pa siya sa pagpusil upat ka higayon sa kriminal apan wala kini maigo.

Bisan kun samaron na, ang biktima nakatawag pa sa radyo sa iyang mga kaubang gwardiya   nga nangayo og tabang.

Gidala dayon ang biktima ngadto sa Balamban District Hospital apan gi-transfer usab dayon sa tambalanan sa dakbayan sa Sugbo. (/WC) - BANAT NEWS