Illegal recruiters nadakpan

CEBU, Philippines - Upat ka gipasanginlang illegal recruiters ang nadakpan sa National Bureau of Investigation (NBI) didto sa kaulohan human sila masigpati sa usa ka mall, sila gikatahong mibiktima sa daghang mga Sugbuanon dinhi sa Cebu.

Ang Assistant Regional Director sa NBI-7 Lauro Reyes nagkanayon nga ang pagdakop sa upat pinasikad sa warrant of arrest nga gi-isyu ni Judge Simeon Dumdum sa Regional Trial Court Branch 7.

Ang nadakpan mao sila si Fernando Geronimo; Anna Lisa Samson, 45, Gulod, Norzagaray, Bulacan; Ronualdo Geronimo, 30, Sapang Palay, San Jose del Monte, Bulacan ug Evangeline Liwanag.

Apan laing upat pa ang padayong gipangita nga sila si Cynthia Mateo, Alisha Batac, Jess Miniano ug Daisy Ibarra.

Si Reyes nagkanayon nga ang mga biktima midangop sa ilang buhatan human wala sila makagawas sa nasud. Matud pa niya nga dili momenus 50 ka mga overseas job applicants dinhi sa Sugbu ang mireklamo batok sa mga suspek nga sila nailad sa mga suspek.

Usa sa mga biktima nga taga A. Lopez, Labangon nga nakahinabi sa media misaysay nga gipabayad na sila og P200,000 isip placement fee ug lain pang bayranan apan hangtud ning mga panahona wala gyud sila makatrabaho sa abroad.

Dihang nakamatikod na silang illegal recruiter ang mga suspek ilaha untang gihangyo nga ibalik ang ilang mga kwarta apan nangikyas na ang mga suspek hinungdan sa pagpasaka nila og kasong illegal recruitment ug estafa.

Ang walo gipasakaan og kasong illegal recruitment in large scale ug walay piyansang girekomendar alang sa ilang temporaryong kagawasan maong kagahapon gidiretso sila og paslak sa Cebu City Jail.

Si Reyes nagkanayon nga may koordinasyon ang NBI ug ang US Embassy sa Manila sa maong operasyon hinungdan sa daling pagkaaresto sa mga akusado.

Si Samson ug Ronualdo naaresto niadtong Agosto 3, 2012 human sila migawas sa Department of Justice sa laing kasong giatubang.

Samtang ang gitumbok nga lider sa maong sindikato nga si Fernando ug Liwanag nadakpan niadtong Agosto 17, 2012 sa usa ka mall sa Manila.

Matud pa ni Reyes daghan nang nabiktima ang maong grupo nga gibanabanang moabot na sa 600 ka tawo ang ilang nailad. Si Reyes mipahimangno sa publiko nga gustong mag-abroad sa pagsusi gyud kun legal ba ang kompanyang ilang gi-aplayan. ( /EIM) - BANAT NEWS