Operasyon sa task force vs illegal fishing gireklamo

CEBU, Philippines - Gihugtan sa Cebu Provincial Anti-Illegal Fishing Task Force (CPAIFTF) ang operasyon batok sa ilegal nga panagat sa lungsod sa Samboan nga atbang usab sa lalawigan sa Negros Oriental.

Positibo ang resulta sa operasyon nga gipasiugdahan sa Team Pukot sa CPAIFTF sa niaging adlaw sa kadagatan sa lungsod sa Dalaguete hangtud sa Samboan sa habagatang bahin sa lalawigan sa Sugbo. Ang field team coordinator sa grupo nga si Joefrey Merencillo nagkanayon nga duna silay gisundan nga mga panagatan gikan sa Dalaguete niadtong adlaw’ng Domingo hangtud sa lungsod sa Samboan

Base sa report ni Merencillo nga gipadangat sa buhatan ni Gob. Gwendolyn Garcia nga usa ka fishing boat, F/B Ocean Green, ang akto nilang nasikop nga nibuhi sa ilang pukot samtang sila nagpaduol.

Ang maong barko nga may luwan nga 11 ka tripulante gipanag-iya sa Green Ray Corporation sa lungsod sa Samboan, gikatahong nakalapas ang maong panagatan sa mga lagda sa Fisheries Act.

Apan giingong mitiyabaw ang mga mananagat sa lungsod sa Samboan sa gihimong operasyon sa CPAIFTF.

Si Mayor Raymund Calderon miklaro nga nagpatabang lang kaniya ang mga mananagat nga makigtigum uban sa kadagkoan sa CPAIFTF aron pasabton sila sa lagda sa pagpanagat.

Nagpaabot si Calderon kung kanus-a makigtagbo ang CPAIFTF sa mga mananagat human niya gipadangat ang maong hangyo. - BANAT NEWS