CAAP misuspenso sa Aviatour

CEBU, Philippines - Gisuspenso na sa Civil Aviation Authority of the Philippines (CAAP) ang lisensya sa Aviatour Air Inc., ang charter airline nga nagbase sa Mactan Cebu International Airport nga nanag-iya sa nahagsang Piper Seneca nga gisakyan ni interior Secretary Jesse Robredo.

Kini maoy gibutyag sa tigpamaba sa Department of Transportation and Communications nga si Nic Conti sa report sa GMA News Online kagahapon.

Lakip sa gisuspenso mao ang mga flying schools nga gipanag-iya sa maong kompanya. Sumala pa ni Conti, ang director general sa CAAP nga si William Hotchkiss maoy mipasuspenso sa lisensya sa maong charter airline aron kasugdan dayon ang imbestigasyon kalabot sa pagkahagsa nga mikalas kang Robredo, piloto ug tag-iya sa maong kompanya nga si Capt. Jessup Bahinting ug co-pilot nga si Kshitiz Chand.

Ang abyon nahagsa sa kadagatan sa Masbate samtang kini misuway sa pag-emergency landing tungod sa aberya sa usa sa duha ka propellers niini apan wala na kaabot sa tugpahanan.

Niadtong Lunes sa buntag ug kagahapon sa hapon nakuha na ang patay’ng lawas ni Robredo ug sunod ang kang Bahinting gikan sa gikahagsaang 180 ka tiil nga giladmon sa dagat.

Ang aide-de camp ni Robredo nga si Senior Inspector Jun Abrasado mao ray bugtong naka-survive sa nahitabo.

Gawas sa on-site investigation, tutukan usab sa CAAP ang sistemang gipatuman sa maong charter airline sa ilang safety management ingon man ang airworthiness sa mga abyon niini. - Gikan sa Wires/EIM (BANAT NEWS)