Ulo sa sikyu gibulit og bala patay

CEBU, Philippines - Patay ang usa ka gwardiya nga giatangan ug gi-ambush diha sa kalibunan sa Sitio Upper Dapdap sa barangay Poblacion 3 sa siyudad sa Carcar niadtong Martes sa alas 6:05 sa gabii.

Ang biktima mao si Rutchel Cabaluna, 33, gwardiya ang trabaho niini nga nagpuyo ra sa maong lugar samtang padayon pa ang kapolisan pag-ila sa mamumuno niini.

Matud ni PO3 Vicente Garces sa Carcar City Police Station dihang nahinabi sa Banat News gikan sa balay sa silingan ang biktima ug pauli na unta sa ilaha dihang kini gibanhigan.

“Ulo tanan ang igo ani,” paghulagway pa ni Garces sa nahitabo sa biktima.

Ang mga polis maoy mitabang sa biktima ug mihatud niini sa Carcar City District Hospital apan gideklarar kini nga patay na.

Unom ka kabhang sa .9mm kalibreng bala ang nakuha diha sa crime scene samtang gisusi usab sa kapolisan ang report nga duna kini pending warrant of arrest sa kasong estafa. – BANAT NEWS