Batang may epilepsy nalumos

CEBU, Philippines - Usa ka 11-anyos nga batang miipsot sa ilang balay ug naligo sa dagat ang nalumos sa barangay Dumlog sa siyudad sa Toledo niadtong Martes sa alas 9:00 sa buntag.

Ang namatay mao si Fritz Omnus,11, nagpuyo sa Luray-2 siyudad sa Toledo ug ang nakakita niya mao si Danilo Lahaylahay, 35, nagpuyo sa maong lugar.

Matud ni SPO4 Carmelito Hornales, desk officer sa Toledo City Police Station dihang nahinabi sa Banat News giingong mibiya ang bata sa ilang balay nga wala mananghid sa inahan nga si Flordeluna niadtong Lunes sa alas 3:00 sa hapon.

Gikan niadto wala na mauli pa ang bata hinungdan nga gipahibalo nila ang kapolisan niadtong Martes sa buntag, dangtan pila ka oras ang milabay dunay nakit-ang bata nga naglutaw sa dagat 50- metros gikan sa baybayon ug patay na.

Matud ni Hornales alas-3 na sa hapon nailhan ang bata nga mao ang anak ni Flordeluna. Nasuta nga ang bata epileptic o may sakit nga patol ug posibleng giatake kini sa maong sakit ug nalumos samtang naligo.  – BANAT NEWS