Napaakan og kobra wa motagam?
CEBU, Philippines - Makabalik na sa iyang trabaho sugod karong adlawa human nakagawas na sa Cebu City Medical Center ang zookeeper nga si Ronaldo “Ronron” Aventurado kinsa napaakan og Philippine Cobra sa miaging semana.
Sumala pa ni Aventurado nga gumikan sa maong hitabo nakaamgo kini apan mipadayag nga nakakuha na siya og ideya kun unsaon ang saktong paagi pagsikop og kobra kung sa higayon duna kini makit-ang susama niini.
Matud pa niya nga lahi gyud ang kobra itandi sa ubang mga bitin nga iyang nadakpan kaniadto nga diin sumala pa niya nakapaak usab kaniya apan wala siya maunsa.
Base sa pamahayag ni Aventurado wala siya matagam sa nahitabo kaniya niadtong Agosto 14 dihang nalandig siya sa tambalanan tungod sa pagkapaak kaniya sa kobra.
Samtang ang Humane Society International (HSI) misusi sa kobra nga nakapaak kang Aventurado nga gibutang sa Cebu City Zoo ug mirekomendar nga ipadala ang bitin ngadto sa Research Institute for Tropical Medicine (RITM) sa kaulohan.
Matud pa nga magamit usab ang maong cobra sa nagkadaiya nga mga pagtoon. Ang pangulo sa Department of Veterinary Medicine and Fisheries nga si Dr. Alice Utlang misaysay nga ilaha karon nga iduso kang Mayor Michael Rama ang rekomendasyon sa HSI.
Una na nga miawhag ang Konseho sa siyudad sa Sugbo ngadto sa Department of Health nga kinahanglang magpundo og anti-venom nga pangdapat sa mga tawo nga mapaakan og halas.
Kini gumikan sa leksyon nga nasinati sa siyudad nga kinahanglan pang adto mokuha og anti-venom sa ubang dapit sa Pilipinas ang siyudad. – BANAT NEWS
- Latest
- Trending
