5 firemen gipasidunggan kay miluwas sa iring

CEBU, Philippines - Lima ka mga bombero sa Cebu City Bureau of Fire Protection ang gipasidunggan kagahapon sa Humane Society International gumikan sa pag-rescue nila sa usa ka iring atol sa sunog nga miigo sa sitio Panagdait sa Barangay Mabolo niadtong Hulyo karong tuiga.

Ang mga gipasidunggan mao sila si FO3 Fernando Rota, FO3 Romero Napua, FO3 Stephen Prieto, FO3 Noel Minoza ug SFO1 Gilberto Solon diha sa buhatan ni Mayor Michael Rama kagahapon.

Sumala pa sa lima una nila kining higayon nga nakadawat og pasidungog ug walay bale kanila kung kini gihatag tungod sa pagluwas nila sa usa ka mananap.

Sa mga dagkong sunog nga mahitabo ilabi na sa mga residential areas dili mawala ang eksenang dunay mga mananap nga isalbar sa kabomberuhan gikan sa fire scene apan wala lang gyud hatagi kaayo og bili bisan na sa lokal media nga nag-apas sa laing anggulo sa ilang mga balita.

Ang pangulo sa Department of Veterinary Medicine and Fisheries (DVMF) nga si Dr. Alice Utlang misaysay sa Banat News nga labing una kini dinhi sa Pilipinas nga dunay gipasidunggang mga bombero ang HSI ug dako kini nga garbo sa Sugbo.

Nagkanayon si Utlang nga uso kaayo sa laing nasud ang paghatag og pasidungog sa mga bomberong makaluwas og mga mananap gikan sa mga fire scenes.

Ang HSI mitanyag og libreng training sa mga bombero ug sa mga sakop sa Cebu City Risk Reduction Management Council (CCRMC) aron tudloan sila sa saktong pag-rescue sa mga hayop kung dunay mga kalamidad.  – BANAT NEWS