Organic nga hayopan gitudlo

CEBU, Philippines - Sugod karong tuiga, ang mga Sugboanon mahimo na nga makakaon og inasal nga walay cholesterol.

Kini ang gitug-an ni Dr. Francisco Dela Peña, ang presidente ug CEO sa Aces Polytechnic College sa Tagum, sa mga siyudad sa Panabo ug Davao, human sa malampuson nga 15 ka adlaw nga training sa mga kadagkoan sa DepEd didto sa City of Naga Division. Ang maong pagbansay gipunting sa tema nga, Accelerating Community Enterprise through Sustainable Agriculture and Technology Innovations on Organic Knowledge (ACES ATI OK).

Sumala pa ni Dr. Dela Peña nga ang maong programa maoy labing una sa tibuok nasud nga mituman sa Republic Act 10068 kon Organic Agriculture Act of 2010.

Iya usab nga gipahibawo nga ang labing una ug model organic farming sa tibuok probinsya sa Sugbo ug sa tibuok nasud sa Pilipinas makita sa DepEd City of Naga Division kay ang unang gi-train nga mga magtutudlo niini nagagikan man sa Naga Division.

Gipasabot ni Dr. Dela Peña uban ni Dr. Silvano Maranga, ang kanhi regional director sa TESDA sa Central Visayas nga gawas nga way cholesterol ang baboy ug ang manok nga buhion dili pa gyud kini manimaho.

Kini tungod kay sa organic farm man magsukad ang pagkaon niini ug ang hugaw usab sa baboy ug manok magamit nga fertilizer sa organic farm.

Si DepEd-7 Regional Director Carmelita Dulangon mapasalamaton kaayo kang Dr. Peña ug Dr. Maranga sa pagbansay nila sa 27 ka mga master teacher ug superintendent sa Naga Divison kay mao usab kini ang mohatag og training ngadto sa ubang mga tulunghaan bahin sa organic farming.

Matud pa niya nga mahinungdanon kaayong ikatudlo kini sa mga kabataan ug ngadto sa tanang mag-uuma nga interesado sa organic agriculture. – BANAT NEWS