Druglord sa Carcar nasikop

CEBU, Philippines - Usa ka gitumbok nga bigtime drug dealer sa siyudad sa Carcar nga paryente sa usa ka dakong politiko nadakpan sa kapolisan didto sa pinuy-anan niini sa barangay Poblacion 2, sa maong siyudad niadtong Martes sa alas 9:30 sa gabii.

Ang nadakpan nga suspek mao si Erwin Barcenas, 45, minyo, kanhi seaman, nga nagpuyo sa maong lugar ug paryente ni Carcar City Vice Mayor Patrick Barcenas.

Ang suspek matud ni P03 Vicente Garces nga nadakpan na kaniadto tungod gihapon sa kalambigitan sa transaksiyon sa gidiling drugas apan piyansado kini. Ang mga butang nga nasakmit gikan kaniya mao ang kalibre .22 magnum nga adunay upat ka buhing bala, duha ka medium size nga pakete sa gituohang shabu, laing 17 ka gagmay nga pakete nga gituohan gihapong shabu, kwarta nga P1,100 nga gituohang halin sa gidiling drugas.

Apil sa mga nasakmit mao ang 1 ka gunting, kutsilyo, duha ka plato, duha ka lighter, duha ka linikit nga marijuana, duha ka toother, plastic nga adunay sulod nga tin foil, gagmay nga plastic nga bakante apan maoy sudlanan og shabu, duha ka lamparilya, 3 ka cell phone, usa ka baso, linikit nga mga tin foil ug sinsilyo nga tag P5 ug P10 nga gisulod sa plastic sa Coke nga mikabat og P10 mil.

Matud ni PO3 Garces nga ang ilang hepe nga si Chief Insp. Teodulfo Manatad maoy nangulo sa maong ronda sa balay sa suspek nga may dala nga search warrant gikan sa korte. Wala makabantay ang suspek sa pagsulod sa mga polis   sa iyang balay hinungdan nga dali kaayong nasakmit ang mga ebidensiya nga gipatong sa lamesa

Gituohan sa kapolisan nga ang daghang bulto sa shabu nadispatsar na niadtong miaging Agosto 16, 2012 atol sa piyesta sa barangay Valladolid ug mga sobra na lang ang ilang nasakmit. Ang suspek anaa na sa karsel samtang gihikay ang tukmang kaso nga ipasaka batok niini. Dugang ni PO3 Garces nga ang suspek makatulo na ka higayong nadakpan ug gani pyansado kini sa kaso gihapon nga naglambigit sa gidiling drugas. – BANAT NEWS