Gwen mobiyahe sa gawas

CEBU, Philippines - Masuwayan na gyud ni Gob. Gwendolyn Garcia ang pagpananghid sa Sandiganbayan kung tugotan ba siyang makalarga sa gawas sa nasud human iluwat ang tulo ka hold departure orders batok kaniya. Si Garcia maoy representante sa Pilipinas ug usa sa 16 ka mga mamumulong sa Asia Entrepreneurship Forum nga ipahigayon sunod buwan didto sa Grand Hyatt Macau, sa China unya sa Septembre 19-20, ning tuiga.

Gitawag ang maong kalihokan og “Setting Asia’s Entrepreneurship Agenda”.

Kansang chairman sa International Advisory Panel, Enterprise Asia nga si Tan Sri Dr. Fong Chan Onn, maoy midapit kang Garcia nga usa sa mga panelist sa tema nga Ministerial Dialogue: Investment Climate Update and Regional Trade Integration in Asia.

Kauban ni Garcia sa maong tigom ang mga opisyal ug mga ekonomista sa mga nasud sa Malaysia, Sri Lanka, Indonesia, Hongkong, Scotland, Estados Unidos ug uban pa.

Ang imbitasyon ni Garcia sa maong kalihokan iyang nadawat niadto pang buwan sa Mayo.

Nasayran nga nag-atubang karon og kasong kriminal si Garcia ug laing pito ka mga opisyal sa Kapitolyo ug pribadong indibidwal nga may kalambigitan sa giingong anomalosong pagpalit sa luna sa mga Balili sa dakbayan sa Naga.  – BANAT NEWS