Flying schools sa Mactan nasubo sa trahedya

CEBU, Philippines - Gidayeg sa mga kadagkoan sa mga dagkong aeronautical schools sa dakbayan sa Lapulapu ang piloto sa Piper Seneca nga si Capt. Jessup Bahinting tungod sa kadako sa natabang niini ngadto sa ilang mga tinun-an ug nasubo sila sa nahitabo niini.

Mipadayag sa ilang kasubo mao si Philippines State College of Aeronautics (PhilsCA ) pinangulohan sa ilang Campus Director nga si Dr. Nonadel Alvarado Soriano ug si Indiana Aerospace University (IAU) President ug CEO nga si Dr. Juvy Toring.

Sumala pa ni Dr. Soriano dako og natabang si Bahinting sa ilang mga tinun-an ug sa mga potensyal nga mga estudyante nga nahatagan og trabaho ni Bahinting.

"Aviatours is one of the companies that caters graduating students of PhilCa Mactan for their On the Job Training (OJT) also some of the graduates with potentials to work in their company has been employed base on their performance during their OJT,” matud pa ni Soriano.

Ang Aviatours maoy usa sa mga kompaniya diin ang mga tinun-an sa PhilsCA mopaubos sa On the Job Training (OJT) gani ang uban sa mga tinun-ang gikakitaan ni Bahinting og potensyal gipangkuha ni Bahinting aron masakop sa iyang kompanya.

Samtang si Toring sa iyang bahin nasubo sa trahedya ug misugyot nga kinahanglan estriktuhon sa Civil Aeronautical Administration of the Philippines (CAAP) ang ilang pag-monitor sa mga abyon sa nasud aron kadtong mga dili na angayang paluparon mahatagan dayon kini og pasidaan.

Matud pa ni Toring ingon gyud ana usahay ang kahimtang sa usa ka eroplano kun dili madisgrasya gumikan sa dautang panahon dunay mga mechanical trouble nga mahitabo samtang naglupad.

Dako og respeto si Toring ni Bahinting gumikan kay ang igsuon niining si Orson Bahinting nahimo usab niyang magtutudlo sud sa dugay’ng panahon sa Aircraft Maintenance Department sa IAU.

Si Bahinting nagtukod usab sa iyang kaugalingong flying school nga Aviatours diin kasagaran sa mga tinun-an mga langyaw gikan sa nasud sa India, Nepal, Korea ug uban pa.

Gawas sa maong duha ka dagkong aeronautical schools, ang mga gagmay’ng flying schools ug tour flights sa Mactan Cebu International Airport mikanselar una sa ilang mga flights agi og pagpaabot sa ilang pahasubo sa pamilya ni Bahinting ug co-pilot niining si Kshitiz Chand ug ni interior secretary Jesse Robredo nga na-crash sa Masbate.

Samtang si Dr. Alice Utlang ang hepe sa veterinary department sa Cebu City mipasalamat kang Bahinting sa pagtabang niini sa iyang sakop nga zookeeper nga si Rolando Aventurado. Si Aventurado napaakan og kobra ug kung di tungod sa pagpagamit ni Bahinting sa iyang abyon aron kuhaon ang anti-venom sa Camiguin hayan nadisgrasya gyud si Aventurado. (Bong Soriano ug report ni Sanden Anadia/EIM) (BANAT)