Training camp sa VECO gisubhan

CEBU, Philippines - Gisubhan sa Visayan Electric Company (VECO) ang usa ka training facility nga gitawag og VECO Development Academy (VDA) didto sa barangay Sirao, usa sa mga bukirang dapit sa syudad sa Sugbo kagahapon sa hapon.

Ang pagsubo gisugdan pinaagi sa usa ka misa nga gidumala ni Rev. Father Dennis Daitol.

Ang maong training camp natarok sa 1.3 ektaryang yuta nga nahimutang taliwala sa bagang kakahoyan sa Sirao.

Ang maong lugar maabot sulod sa 45 minutos nga biyahe sa behikulong de motor gikan sa kapatagang bahin sa dakbayan sa Sugbo.

Si Dennis Garcia, presidente sa VECO mipasabot nga gusto nilang itunol ngadto sa mga pagabansayon ang makapatagbaw nga serbisyo sa maong training camp diin ang presko nga huyohoy sa mabugnaw nga hangin maoy molingaw sa tanan.

Ang maong training camp maoy kinaunahang building nga gipatukod sa taga VECO karong tuiga ug dugangan pa kini og laing edipisyo.

 Ang gisubhan nga building adunay training room, may opisina ug tool room nga puno sa nagkalainlaing ginamiton sa kuryente.

Gibutyag ni Engr. Julius Algabre, Technical Skills Training Department Manager sa VECO nga ang ikaduha nga building nga may upat ka lecture room sugdan sa pagpanday sa katapusang kuwarter niining tuiga.

Tungod niining training camp sa VECO kasaligan na ang mga trabahante niini nga labing hanas ug suhito sa ilang trabaho aron ikahatud ang tukmang serbisyo ngadto sa 1.73 milyones ka konsumedor niini sa Metro Cebu nga anaa sa syudad sa Sugbo, Mandaue, Talisay, Naga ug mga lungsod sa Consolacion, Liloan, Minglanilla ug San Fernando.

Mitambong usab sa   maong pagsubo ang mga opisyal sa barangay Sirao nga gipangunahan sa ilang kapitan sa barangay.  (BANAT NEWS)