Milugos sa special child tiklo

CEBU, Philippines - Mikagulkol na karon ang usa ka ulitawo kinsa gisuspetsahang milugos sa usa ka dalagita nga special child didto sa katubhan sa sitio Banghitao, barangay Banban, syudad sa Bogo sa miaging udto.

Ang biktima nga nagpangidaron og 16-anyos gihulagway nga special child samtang ang suspetsado kansang ngalan giila lang   nga Dario, 22, nga silingan sa biktima.

Sayo niini midangop sa kapolisan ang biktima kauban ang inahan niini ug misumbong sa maong hitabo.

Si Chief Insp. Ceferino Abastas Tabay Jr, hepe sa kapolisan sa syudad sa Bogo milihok dayon sa pagsikop  sa suspetsado.

Ang inahan sa biktima mibutyag sa kapolisan nga iyang gisugo ang iyang anak   sa pagpalit og softdrink sa silingan nilang tindahan diin didto usab sa maong higayon ang suspetsado ug ang mga kauban niini nga nag-inom.

Sa pagpauli sa biktima nga nagbitbit sa iyang pinalit misunod ang suspetsado ug gidala ang biktima ngadto sa katubhan sa maong dapit ug didto gipahimuslan ang pagkababaye niini.

Human molampus sa yawan-on niyang buhat misuway og sibat ang suspetsado samtang ang biktima mipauli usab sa ilang balay ug misumbong sa iyang inahan sa nahitabo kaniya.

Ang suspetsado nagpaabot na lang sa tukmang kiha nga isang-at batok kaniya. (/WC) (BANAT NEWS)