Nagda'g HIV dinhi 3 ka grupo

CEBU, Philippines - Nagkalainlaing grupo sa mga tawo ang nagsabwag og human immuno virus (HIV) dinhi sa Sugbo nga nakapahimo sa dakbayan nga ika-duha sa Metro Manila nga may labing daghang kaso sa HIV sa tibuok nasud.

Mao kini ang gibutyag ni Dr. Chona Loma, hepe sa social hygiene clinic sa Cebu City Health Department (CCHD) kinsa miingon nga ang labing dako og natampo sa pagdagsang sa kaso sa HIV dinhi mao ang injected   drug users (IDU).

Gisundan kini sa mga bayot nga makighilawas og lalake, ug mga overseas foreign workers (OFW), matud pa ni Loma.

Nasuta sa rekord sa CCHD nga gikan sa l989 hangtud ning tuiga 2012 adunay 536 ka mga kaso sa HIV dinhi sa dakbayan sa Sugbo ug nagsaka ang maong gidaghanon matag tuig.

Matud ni Loma nga aron maprotehian ang mga commercial sex worker (CSW) gikan sa mga tawong apektado sa HIV, gihatagan nila kini matag karon ug unya og libreng condom.

Nasuta usab ni Loma nga base sa ilang rekord nagsaka usab ang gidaghanon sa mga CSW matag tuig nga makarehistro sila og gikan sa 1,800 ngadto sa 2,500.

Wala hinuon motug-an si Loma kun pila na ang nangamatay nga mga apektado sa HIV dinhi sa dakbayan sa Sugbo tungod kay daan nang gibalaod   nga angay protektahan ang dungog sa mga lalaki ug babaye nga nasugamak sa maong matang sa balatian.

Miingon si Loma nga ang mga tiggamit og gidiling drugas nga migamit na og heringgilya maoy dali kaayong magkatinakdanay   sa HIV.

Samtang ang mga OFW ug mga bayot makatakod sa ilang sakit pinaagi sa sexual contact.

Mibutyag usab si Loma nga ang ilang ikabutyag sa taga media ug sa publiko mao ra ang gidaghanon sa mga kaso sa HIV samtang ang mga hingtungdang nataptan niini magpabiling confidential. (BANAT NEWS)