Klinika, 9 balay nasunog

CEBU, Philippines - Siyam ka panimalay ang nasunog diha sa dalan M. Velez barangay Capitol Site pasado alas-5 sa hapon kagahapong adlawa.

Sa dental clinic nga gipanag-iya sa usa ka Josephine Uy giingong nagsugod ang sunog nga mikatap sa mga kasikbit nga balay ug establisamento. Si Cebu City Fire Marshall Chief Insp. William Tacaldo mibutyag sa mga tigbalita nga ilang nadawat ang maong alarma alas 5:20 ug ilang nakontrolar sulod lang sa 25 minutos human maisa sa 3rd alarm ug gibanabanang mokabat sa P800 mil ang danyos diin unom ka panimalay ang hingpit naugdaw samtang tulo ang partially damage. Usa ka Charito Alegre, 48, mibutyag sa mga tigbalita nga ang 15-anyos niining pag-umangkon nakakita sa silingang si Juanito Putot nga igsuon sa tag-iya sa dental clinic ang midagkot sa klinika.

Si Putot gidakop dayon ni PO2 Carlo Balasoto dihang miikyas kini pagkakitang midako na ang kalayo, apan kini kusganong mihimakak sa pasangil samtang kini gidala sa mga awtoridad.

Matud pa niya nangihi ra siya ug nakurat pagkakita nga nagdilaab na ang iyang kwarto nga nahimutang luyo sa klinika.

Gisusi pa karun sa kadagkuan sa arson investigators ang maong alegasyon.

(BANAT NEWS)