CEBU, Philippines - Mibahad ang tanang Katoliko nga molusad og civil disobedience sa higayong aprobahan sa kongreso ang Reproductive Health (RH) Bill.
Ang maong bahad gibutyag ni Dr. Rene Josef Bullecer, ang presidente sa Human Life International kinsa miingon nga gawas sa civil disobedience, hingpit pa nilang hikawan sa ilang boto ang mga magbabalaod nga mosuporta sa pagkabalaod sa RH.
Gipasabot ni Bullecer nga usa sa mga butang nga may labot sa civil disobedience mao ang paglikay sa pagbayad og buhis. Atol sa Tapok-Tapok sa Sugbo, usa ka tulumanon sa mga komentarista sa radyo nga gidumala ni Sam Costanilla, si Bullecer mikondenar sa tanang doktor sa goberno kinsa mitugot nga ipatomar sa kababayen-an ang mga pildoras, matang sa kontraseptibo nga magpugong sa pagpanganak nga unta kining mga butanga makamatay man sa hingtungdan. Isip usa ka doktor, si Bullecer nagkanayon nga sa iyang panuki-duki nasayran niya nga ang mga pildoras nga ihatag nga libre sa goberno ngadto sa magtiayon ubos sa balaod sa reproductive health maoy makamugna og nagkalainlaing kanser sa lawas sa mga inahan ug ni kinsa mang mga babaye o kaha lalaki nga motumar niini.
Busa alang kaniya nga mao kini hingpit nga makapuo sa populasyon sa Pilipinas kay gawas nga wala nay mga bata nga matawo, hasta usab ang mga inahan, mangamatay usab. Matud pa niya nga way makaikyas niining mga kontraseptibo nga ipanghatag na unya nga libre sa matag pamilya ilabi ang mga pamilyang nakapahimulos sa Pamilyang Pilipino Pantawad Program (PPPP) kay bisan ang condom, puwerting makadaot sa lawas sa lalaki nga mogamit.
Gibutyag niya gisaad na sa kagamhanan nga ubos sa RH Bill ang matag magtiayon nga nakapahimus sa 4Ps dili makalikay sa mga pildoras, condom ug uban pang pangpugong sa panganak nga iapud-apod kanila matag karon ug unya.
Kuyaw kini matud pa ni Bullecer tungod kay ang tumong niini mao ang pagpuo sa mga inahan nga mogamit niini. Sukwahi sa gipahayag ni Dr.Chona Loma, ang hepe sa Social Hygiene Clinic sa Cebu City Health Department kinsa nagkanayon nga nagpabaha sila og linibo ka condom matag tuig alang sa kaliboan ka mga commercial sex workers nga babaye aron may proteksyon sila batok sa HIV.
Apan alang kang Bullecer nga bisan ang condom delikado kaayo sa mga mogamit niini kay makamatay lang gihapon ug labaw sa tanan ang paggamit og mga kontraseptibo maoy matang sa ginamiton pabor sa aborsyon.
Gibutyag ni Bullecer nga sa tanang mga nasud sa kalibotan karon ang Pilipinas maoy may ekonomiya nga labing kusog nga nagsaka sa pagkakaron itandi sa ubang mga nasud nga nagpatuman sa family planning.
Dinhi sa nasud matud pa ni Bullecer, kusog ang ekonomiya tungod sa pagsaka sa populasyon nga maoy nakapabilyonaryo sa daghang mga negosyante sa nasud.
Kini tungod kay matud pa ni Bullecer nga ang daghang populasyon maoy magpabuhi sa tanang mga negosyo kay aduna may mamalit.
Apan miingon siya nga sa mga nasud nga sama sa Australia, Canada, New Zealand, Japan ug uban nagproblema sila karon kun unsaon pagpadagan ang ilang ekonomiya tungod sa pagnihit sa ilang populasyon gumikan sa pagpraktis nila sa family planning program.
Sa samang higayon kun magnihit ang populasyon sa Pilipinas magnihit na usab ang mosulod sa simbahan kay wala nay manimba.
Busa matud pa ni Bullecer nga anhi ipakita sa mga Katoliko ang huwes de kutsilyo nga pagsupak sa mga balaod nga gipatuman sa goberno kun ipatuman niini ang balaod nga magpugong sa pagsaka sa populasyon sa Pilipinas. (\WC) (BANATNEWS)