Turistang pamilyang Briton gikawatan

CEBU, Philippines - Dili gyud makalimot ang usa ka Briton ug ang pamilya niini sa pagbisita nila dinhi sa Sugbu, apan tataw nga dili lang tungod sa kaanindot sa dapit kundili ang bati nga kasinatian nila sa mga kamot sa mga kawatan.

Ang Briton nga si Michael Andrews Byrnes, 42, inubanan sa security personnel sa gipundohang resort sa barangay Marigondon sa dakbayan sa Lapulapu midangop sa Lapulapu City Police Office ug misumbong sa nahitabo kaniya ug sa iyang anak. Sumala pa sa reklamo ni Byrnes diha sa Theft and Robbery Section gikan sila namalit sa usa ka dakong mall sa barangay Basak sa maong siyudad ug tungod kay dugay silang nakasakay og taksi nakadesider nga manakay og traysikol pabalik sa resort.

Apan dihang mobayad na kini sa traysikol wala na diha iyang pitaka ug gilaslas na usab ang knapsack sa iyang anak maong nagpatabang sila sa gwardiya sa resort ug gidala sila sa LLCPO. Si Byrnes mibutyag nga P24,000; 190,000 Japanese Yen ug credit cards ang sulod sa iyang wallet, nawala usab ang duha ka mga digital camera sa knapsack sa iyang anak. ( /EIM)  (BANATNEWS)