CGMA migawas na sa tambalanan

CEBU, Philippines - Migawas na gikan sa Makati City Hospital si kanhi presidente ug karon Pampanga Rep. Gloria Macapagal-Arroyo kini bisan pa man gikatahong ang doktor niini mirekomendar nga kinahanglan si Arroyo magpatambal sa abroad.

Sumala pa sa report sa GMA News Online, si Arroyo pabiling nag-antos sa "progressive obstruction" sa titanium plate nga gibutang sa iyang cervical spine nga tuyong gibutang aron makabarog kini.

Kagahapon sa udto nakagawas si Arroyo human sa pipila ka adlaw nga pagkalandig sa maong tambalanan ug gipailawom sa quantum CT scan human giingong nakita nga   nadiskarel ang pagkabutang sa titanium plate niini sa iyang cervical spine.

Sa pagkakaron, ang Sandiganbayan adunay gipagawas nga hold departure order batok ni Arroyo tungod sa kasong plunder nga giatubang niini may kalambigitan sa pasangil nga iregularidad sa paggamit sa pundo sa Philippine Charity Sweepstakes Office. ( EIM)