CONG. Gullas mihangop sa bag-ong School Supt. sa Naga

CEBU, Philippines - Gihangop ni Cong. Eduardo Gullas sa unang distrito sa lalawigan ang bag-ong natudlo nga division superintendent   sa dakbayan sa Naga.

Kini human pangunayi ni Regional Director Carmelita Dulangon sa Department of Education (DepEd)- ang pag-instalar   kang Dr. Senen Paulin isip bag-ong Schools Division Superintendent sa maong dakbayan didto sa Naga Central Elementary School sa miaging adlaw.

Si Dr. Senen Paulin nga kanhi maoy schools division superintendent sa siyudad sa Toledo maoy nipuli ni Dr. Caridad Labe, ang kanhi schools division superintendent sa siyudad sa Naga kinsa na-promote na usab ngadto sa pagka-assistant regional director sa DepEd-7.

Mitambong sa maong installation ni Paulin mao ang mga school head o principal, master teacher, guidance councilor ug mga presidente sa PTA sa 24 ka mga elementary school ug 22 ka mga high school nga nahisakop sa siyudad sa Naga, ingon man ang mga opisyal sa siyudad sa Naga gipangulohan sa city administrator isip representante ni Naga city mayor Valdemar Chiong ug mga konsehales, mga opisyal sa DepEd regional ug provincial offices.

Si Dr. Dulangon nibasa atubangan ni (Paulin) sa kamanduan nga gipirmahan ni DepEd Secretary Armin Luistro nga nagtudlo kaniya (Paulin) sa maong katungdanan sa Naga.

Matud pa ni Dr. Dulangon nga bulahan kaayo si Paulin tungod kay ang mga opisyal sa Naga ingon man si 1st District Cong. Eduardo Gullas mihangop ug midawat sa pagdestino ni Paulin dinhi sa Naga.

Gipahinumdom ni Dr. Dulangon kang Paulin nga kinahanglang mahimo kining maayong leader pinaagi sa pag-atiman sa mga magtutudlo nga iyang mga sakop.

 Gitambagan usab ni Dr. Dulangon ang tanang mga superintendent ug mga principal nga “you should practice always transparency aron way reklamo gikan sa mga ginikanan,” usa na niini mao ang paggamit sa Monthly Operating and Other Expenses (MOOE) alang sa kaayuhan sa mga tinun-an ug dili gamiton ang PTA alang sa mga kinahanglanon nga mga proyekto sa eskwelahan.    - BANAT NEWS