Firetruck sa ERUF midaro sa duha ka sakyanan

CEBU, Philippines - Duha ka mga sakyanan ang gidaro sa usa ka mirespondeng rescue firetruck sa Emergency Rescue Unit Foundation (ERUF) nga padulong unta sa usa ka sunog sa Brgy. Ibo dakbayan sa Lapulapu sa milabay’ng adlaw.

Hinuon gamay lang nga pangos ang naangkon sa usa sa mga tag-iya sa sakyanan nga si Roberto Florida nga maoy nagmaneho sa Toyota -VIOS ug Judimar Amamag-id nagmaneho sa usa ka truck.

Samtang ang nakadasmag mao ang ERUF Rescue firetruck nga gimaneho ni Cristian Don Engracial, residente sa Brgy. Alang-alang dakbayan sa Mandaue.

Sa imbestigasyon ni PO3 Dioscoro Arong sa Traffic Division sa dakbayan sa Lapulapu nasayran nga mga alas 12:20 sa milabay’ng adlaw miresponde sa alarma sa sunog si Engracial diha sa barangay Maribago apan pag-abot niini sa barangay Ibo nadaro niini ang maong mga sakyanan.

Mirason si Engracial nga nag-siren sila niadtong higayona apan wala kini panumbalinga ni Florida ug Amamag-id hinungdan nga iya silang nadaro.

Si Florida nahiagum sa gamay’ng pangus sa kalawasan apan guba ang awto niini samtang naguba usab ang trak ni Amamag-id.

Matud pa ni Arong kasong reckless imprudence resulting to damage to property ang ipasakang kaso ngadto ni Engracial.

Ang alarma sa sunog nadawat 11:45 sa udto diha sa sitio Datag, Brgy. Maribago dihang ang panimalay ni Rica Pangatungan nasunog tungod sa pag-overheat sa air-conditioning unit niini.

Hinuon gibanabana nga mokabat lamang sa P5 mil ang danyos sa maong sunog nga nakontrolar sulod sa tulo ka minutos.   - BANAT NEWS