Nag-eGAME 5 Korean sikop

CEBU, Philippines - Lima ka Koreano ang gidakop sa kapolisan human gikatahong mipahigayon og illegal nga online games sulod sa ilang giabangang lawak sa dalan Banyan sulod sa Pacific Grand Villas sa barangay Subabasbas sa syudad sa Lapu-Lapu sa miaging gabii.

Kasong paglapas sa RA 9287 o Illegal Numbers Game ang ipasaka batok sa mga Korean sila si Park Sangmin alyas Steve Lee, 32; Jeong Jong Ho alyas Eric, 42; Park In Gyu, 30; An Ji Hwan, 32; ug Kang Jae Wook nga kasamtangang nagpuyo sa maong syudad.

Ang hepe sa Regional Special Operations Group nga si Chief Inspector George Ylanan mibutyag nga adunay miduol kanila ug nagpangutana kalabot sa gibuhat sa lima tungod kay wala man kini gawas-gawas sa ilang lawak.

Hinungdan nga ila kini nga gipaubos sa surveillance sulod sa tulo ka buwan ug ilang nadiskubrehan nga illegal numbers game nga online ang gi-operate sa grupo.

Tungod niini, matud pa ni Ylanan ilang gikonsulta ang maong kaso ngadto ni RTC Branch Meindrado Paredes ug mikuha usab sila og search warrant human ang lima ka Koreano nakit-ang nakalapas sa atong balaod.

Uban ni Insp. Ruel Burlat ug Insp. Romeo Sentita Jr. si Ylanan mi-serve sa search warrant ngadto sa panimalay ni Lee ug naaktuhan ang grupo nga naa tungatunga sa ‘online betting’ o pinustahay sa sugal gamit ang ilang mga computers ug uban pang gamit alang sa internet.

Nakuha gikan sa grupo ang tulo ka CPU; pito ka monitors ; tulo ka keyboards; usa ka laptop; tulo ka UPS; tulo ka calculators; lima ka Samsung SII cellphone; usa ka Iphone 4; upat ka Samsung Anycall cellphone; usa ka Samsung Galaxy Tab; usa ka CYON Cellphone; usa ka Nokia 2630; usa ka Samsung A1080 cellphone; duha ka MP3 Players; usa ka LG USB; usa ka LG Hard Disk Drive; usa ka Ipad; upat ka Samsung chargers ug notebook sa listahan sa mga account numbers sa mga namustang mga Koreano.

Ang grupo sumala pang Ylanan maoy mo-facilitate sa mga tapador gikan sa Korea, giingong usa sa ilang pustahan mao ang duwang football ug uban pa.    - BANAT NEWS