CPDRC 'prosti' dili tinuod

CEBU, Philippines - Nagduda si Gob. Gwendolyn Garcia sa motibo sa pagtumaw sa usa ka babaye nga mireklamong gihimo siyang boring sulod sa Cebu Provincial Detention and Rehabilitation Center.

Kini gumikan migawas sa imbestigasyon nga kompleto ang iyang papeles sa pagkuha og Visitor’s Pass aron makaduaw sa iyang kapuyo sulod sa bilanggoan.

“Wild horse cannot drag you to the CPDRC kung di ka gustong moadto. At any point kung hain ka gikan hangtud moabot ka didto you can always shout out foul, gibinuangan ko, gi-traffick ko, gihimo kong prostitute,” matud pang Garcia.

Ang barangay kapitan sa Lamac, Consolacion nga si Nestor Maglasang miluwat og certification nga ang maong babaye kapuyo sa binilanggo sulod na sa 13 ka tuig ug ang munisipyo sa lungsod mihatag usab niini og cedula.

Ang maong mga dokumento maoy pangitaon sa CPDRC alang sa mga dalaw sa mga binilanggo aron makasulod kini atol sa adlaw sa tingbisita.

Giklaro ni Garcia nga ang CPDRC dili investigating agency nga maoy mosusi kung tinuod ba ang mga dokumento nga iduso sa ilang buhatan. “If these documentary requirements are met then the process continues and that therefore a visitor pass was issued to her,” sumala pa ni Garcia.

Sa pagkakaron gikanselar una ang mga visitor’s pass gumikan sa maong kontrobersiya.

Gipahibawo ni Garcia nga dugang dokumento ang ilang gikinahanglan aron pag-isyu sa maong visitor’s pass sama sa affidavit sa duha ka tawo nga magmatuod nga asawa o kaha kapuyo ang moduaw sa binilanggo.

Si Capitol consultant on penology, Jose Ma. Gastardo mirekomendar ngadto kang Garcia nga wala na’y angayan imbestigahon sa maong kaso. ( /EIM) - BANAT NEWS