CEBU, Philippines - Aron pag-ila sa ilang maayong nabuhat isip mga polis, si Mayor Michael Rama mipahibalo kagahapon nga mohatag siya og cash rewards nga tag P50 mil matag usa sa tulo ka mga polis nga sakop sa Cebu City Police Office.
Ang tulo bag-ohay lang nga gipasidunggan didto sa kaulohan gumikan sa natampo nila sa paggukod sa mga gidudahang tulisan kung diin nabutang sa risgo ang ilang kinabuhi.
Ang maong mga polis naglangkob nila ni PO2 Elrich Catacutan, PO1 Roy Ceniza ug PO1 Ernesto Silva. Si Ceniza ug Catacutan nangaangol sa maong shootout samtang duha ka gwardiya ug tulo ka tulisan ang nakalas.
Ang maong pagpanulis nahitabo niadtong bulan sa Septiyembre sa miaging tuig sa Robinsons Mall dihang gitulis sa Cabatingan Robbery Gang nga gipangulohan ni Dionesio Cabatingan alyas Junjun Cabando ang bank teller sa China Bank.
Gipasidunggan si Catacutan isip most outstanding non-commission officer samtang ang duha gihatagan usab og special citation sa ilang nabuhat.
Nagkanayon ang mayor nga usa ka maayong ehemplo alang sa tanan ang gibuhat sa tulo ka polis alang sa pagpatuman sa kahapsay ug kalinaw sa dakbayan.
Gawas sa cash reward, mohatag usab og ayuda sa CCPO ang siyudad nga moabot ngadto sa P200 mil nga gituohan sa mayor nga dako og matabang sa panginahanglan sa maong kapolisan. - BANAT NEWS