176-tuig nga katukoran sa Talisay gihandom

CEBU, Philippines -  Bisan og siyudad na ang Talisay apan kagahapon gisaulog sa siyudad ang ilang ika-176th founding anniversary sa pagka-munisipyo niini kaniadto.

Si Talisay City Administrator Richel Bacaltos mibutyag sa Banat News kagahapon nga ang pagsaulog kagahapon sa pagka-munisipyo sa Talisay gibuksan kini sa usa ka Santos nga Misa diha sa Santa Teresa de Avila Parish sa barangay Poblacion sa alas 9:30 sa buntag.

Si Kongresista Eduardo Gullas uban sa iyang apo nga si Samsam Gullas, Mayor Socrates Fernandez, Bise Mayor Alan Bucao, mga konsehal sa Talisay, department heads ang mitambong niini.

Gisunod dayon ang Cultural Heritage Mapping diin dunay gipahigayong exhibit diha sa people’s hall sa city hall nga gibuksan ngadto sa publiko ni Mayor Fernandez, Bucao ug Samsam Gullas.

Mga alas 2:30 kagahapon gisugdan ang sports fest alang sa mga kawani sa city hall.

Matud ni Bacaltos nga wala ideklara kagahapon sa siyudad nga holiday tungod kay ang Talisay usa naman kini ka siyudad karon ug magsaulog kini sa anibersaryo sa pagka-siyudad matag Enero 12.

Kahinumduman nga ang Talisay nahimong siyudad niadtong buwan sa Disyembre 2000 ubos sa Akta Republika 8979 nga gipasar ni Kongresista Gullas kinsa mao sad nahimong unang mayor sa dakbayan dihang napili kini niadtong eleksiyon sa tuig 2001.

 Gikan sa P68 milyones nga internal revenue allotment, ang Talisay karon duna na kini IRA nga sobra sa P300 milyones.    - BANAT NEWS