Unom ka CCPO officials girelibohan tungod sa lapso

CEBU, Philippines -  Unom ka mga opisyal sa Cebu City Police Office (CCPO) ang girelibohan sa ilang mga pwesto niadtong Martes tungod sa giingong mga lapso sa pagpahigayon nila og checkpoints.

Si CCPO Director Melvin Buenafe mibutyag sa mga tigbalita nga iyang nadawat ang maong order gikan sa Police Regional Office (PRO-7) niadto pang Martes.

Ang relibohan mao sila si deputy city director for operations Supt. Rey Tiempo, hepe sa Police Station 3 nga si Chief Insp. Andres Bayarcal; Insp. Elizer Abrigana, Insp. Alexander Quijano, Insp. Eugenio Raganas ug Insp. Jakman Atom.

Matud pa ni Buenafe nga dili siya makakompirmar kun ang hinungdan sa pagrelibo kanila kung ang mga lapso ba nila sa pagpahigayon og checkpoint.

 “They should take this as a lesson, dahil ganito ka seryoso ang ating command. That is part of the disciplinary system,” pahimangno pa ni Buenafe sa ubang polis.

Samtang ang hepe sa CCPO-admin division Chief Insp. Lourdes Ingente mibutyag nga ang mipirma sa maong relieved order mao si Sr. Supt Petronelli Baldebrin sa Regional Personnel and Human Resources Development Division.

Kasamtangan unang mo-report ang unom ka opisyal sa Regional Personnel Accounting Holding Unit samtang nagpaabot kini sa desisyon sa ilang labaw.   - BANAT NEWS