Konsehal Ylanan nasupo sa mga kauban

CEBU, Philippines - Nasupo kagahapon sa buntag atol sa regular nga sesyon sa konseho sa dakbayan sa Talisay si Konsehal Val Ylanan sa iyang pagbabag sa gipasar nga resolusyon ni Konsehal Bernard Joseph Odilao nga nagtugot sa paghatag og permit sa duha ka quarry diha sa barangay Lagtang, dakbayan sa Talisay.

Si Ylanan kinsa vice chairman sa council committee on environment giingong mipirma kini sa committee report sa milabay’ng semana kabahin sa pagtugot og hatag og permit sa quarry diha sa Lagtang.

Apan dihang gipasar ang duha ka resolusyon numero 2012-28-2 ug 2012-28-3 nga nagtugot sa paghatag og permit alang sa quarry nga gipanag-iya nila ni Odalia Madamba ug Ma. Therese Aznar nga parehong nahimutang diha sa sitio Tiguib, Lagtang, ang mga konsehal nga sakop sa oposisyon nga sila si Danny Caballero ug Romeo Villarante lakip si Ylanan mibabag niini.

Si Ylanan nagkanayon nga duna siya’y katungod nga mobakwi sa iyang huna-huna sa dili pag-uyon sa maong mga resolusyon.

Gibutyag ni Ylanan nga wala siya gipatawag aron makatambong sa meeting kabahin sa committee report ug wala niya mabasa ang maong committee report ug gipapirmahan kini kaniya atol na sa milabay’ng sesyon.

Gipasabot sa konsehal nga mahimong dakung insulto kung dili siya mopirma sa maong committee report atol sa ilang sesyon apan alang kaniya ang maong committee report dili himuong basehan aron tugutan ang quarrying.

Si Caballero kinsa midepensa usab sa pagsupak ni Ylanan nagkanayon nga dili consistent ang konseho sa pagpasar og resolusyon kinsa si Odilao bag-ohay lang mipasar og resolusyon pagpahunong sa quarry apan sa milabay’ng sesyon mipasar usab kini og resolusyon sa paglibkas niini.

Gipadayag ni Caballero nga landslide prone area ang dapit nga butangan og quarry niining ting-uwan.

Si Caballero misugyot nga botohan na lang kini apan napildi sila tungod kay mas daghan ang uyon niini.

Si Bise Mayor Alan Bucao, kagahapon mipahimangno sa mga sakop sa konseho nga basahon ang ilang gipirmahan nga committee report aron dili masubli ang kalibog. (Brenda D. Batuto/EIM) (BANAT)