Marcelo Fernan Bridge subling tak-upan

CEBU, Philippines - Gipahibalo sa Department of Public Works and Highways (DPWH) 7 nga tak-opan ang pikas lane sa United Nation Avenue nga manukad sa dalan M. C. Briones ug paingon ngadto sa ibabaw nga bahin sa Marcelo Fernan Bridge sa dakbayan sa Lapulapu sugod karon Agosto 20 niining tuiga.

Buhaton kini tungod kay dunay tapakang mga libaong sa maong dalan nga mokabat og usa ka kilometro. Kini may gahin nga P28 milyones sa nasudnong kagamhanan.

Si Engineer Rechelle Lumapas nga maoy project engineer sa DPWH-7 nga nahinabi sa mga tigbalita miingon nga molungtad og 180 ka adlaw nga gidugayon ang ilang pagtrabaho sa maong dalan.

Gipasabot ni Engineer Lumapas nga ang pikas lane nga ilang ayohon maoy ilang tak-opan apan abli ang pikas lane niini.

Dugang pa niya nga kun mahuman na ang ilang kaugmaran sa maong lane maoy ilang isunod sa pag-ayo ang pikas na usab sa maong dalan nga mao na usab ang ilang pagatak-opan.

Matud pa ni Engineer Lumapas ang pundong gamiton alang sa road repair kabahin kini sa P156 milyones nga pundong gamiton unta alang sa pagtukod og flyover sa Ouano Avenue sa maong dakbayan.

Si Edwin Ermac sa Traffic Enforcement Agency of Mandaue (TEAM) nga nahinabi sa mga tigbalita mibutyag nga may mga traffic enforcers nga ibutang sa maong dalan aron hapsay ang dagan sa mga sakyanan. (Romeo T. Limpangog/EIM) (BANAT)