2 ka suspek nga tulisan sikop

CEBU, Philippines - Duha ka gidudahang tulisan nadakpan sa kapolisan sa barangay Poblacion, dakbayan sa Danao sa miaging gabii.

Si PO2 Rocelo Campo sa kapolisan sa maong dakbayan miila sa mga suspetsado nga sila si   Archie Camansi, 18, ug Ariel Osma, 24 , nga pulos taga barangay Masaba sa maong dakbayan.

Si PO2 Campo nga nahinabi sa Banat News mibutyag  nga ilang nadawat ang taho gikan sa nagpakabanang molupyo sa barangay Poblacion kinsa nakamatikod sa mga suspek nga pulos nagtangkil og armas de fuego

Busa gitubag dayon ang maong alarma nila ni PO1 Anthony Mata ug P01 Wendel Jay Barluan kinsa maoy misakmit sa maong mga armas nga pulos .38 kalibre nga revolver human nila kini rikisaha.

Gidala dayon ang mga suspek sa buhatan sa kapolisan sa Danao dihang nasuta nga pulos kini walay mga papeles. Ang duha ka dinakpan   gibalhog dayon sa prisohan samtang gihikay dayon ang kaso nga angay isang-at batok sa duha.

Si PO1 Campo miingon gidudahan nila ang duha nga nalambigit sa mga tulis nga nahitabo sa maong dakbayan ug mao kini ang ilang gisuta karon. (BANAT NEWS)