Pamilyang demolisonon nahuwasan

CEBU, Philippines - Nahuwasan sa kakulba ang 29 ka pamilya sa barangay T. Padilla ning dakbayan sa Sugbo kay wa mahinayon ang pagdemolis sa ilang mga balay.

Si Evangeline Abejo ang lider sa   Nasudnong Katawhang Kabos (Nakabos) nagkanayon nga human nila madawat ang demolition notice niadtong Marso ning tuiga nangandam na sila aron kun mahinayon makahakot dayon sila sa ilang mga butang ngadto sa relocation site nga pabalhinan kanila.

Apan matud pa ni Abejo nga sa pagkakaron nagsabot-sabot ang kagamhanan sa siyudad ug ang mga tag-iya sa mga luna nga gitarokan sa 29 ka balay ug nanghinaot sila nga dili na lang unta ihinayon ang pagpapahawa kanila sa maong dapit.

Si Abejo mapasalamaton kaayo sa mga  tinugyanan sa Division for the Welfare of the Urban Poor (DWUP) kay mao kini ang mitabang aron dili mapahawa ang hinungdang mga pamilya nga nagpuyo sa anaa sa 4,834 metro kuwadrado nga pribadong lote.

Ang hangyo sa mga hingtungdang molupyo  nga kun mahimo ang kagamhanan na lang maoy mobayad sa maong yuta ug anha usab sila mobayad og hinayhinay sa kagamhanan.

Matud pa ni Abejo nga ang mga sakop sa T. Padilla Villa Urban Poor Association makaluluoy kaayo kun mapahawa sa kasamtangan nilang gipuy-an tungod kay apektado kaayo ang ilang panginabuhi kun mabalhin sila og laing puwesto. Pipila sa nagpuyo sa maong lugar may gidugayan na nga 58 ka tuig. (BANAT NEWS)