DSWD molusad og training para sa katalagman

CEBU, Philippines - Ang nasinatian sa taga Luzon ug Metro Manila nga baha nga mugna sa kasagaran lang nga hangin nga habagat nagtukmod sa kagamhanan dinhi sa dakbayan sa Sugbo sa pagpasiugda og training kon bansay-bansay sa katawhan aron makapangandam sa tanang higayon sa mga katalagman nga moabot.

Pasiugdahan kini sa Department of Social Welfare and Development (DSWD)7 kinsa maoy mohikay sa tanang plano bahin sa maong training, matud pa sa tigpamaba sa DSWD 7 Jaybee Binghay. Matud niya nga ilang han-ayon ang lugar nga kapahigayonan niini, ingon man ang mga trainor o lecturer ug ang mga patambungon.

 Ang mga butang hisgotan sa maong training mao ang bahin sa rescue operation ug sa pagpangandam sa higayong muabot sa palibot ang baha, pagdahili sa yuta, linog ug uban pang natural nga katalagman. Sa maong pagbansay itudlo ang mga teknolohiya bahin niini aron ipakatap sa tanang tawo sa matag komunidad buwahan to sa pag-abot sa katalagman dili na matarantar ang tanan kay may kasayoran naman sila bahin sa pagluwas sa ilang kaugalingon.

Tawgon   sa DSWD kining maong kurso nga Family and Community Disaster Preparedness   nga ipahigayon sulod sa lima ka adlaw. Tudloan ang tanan kalabot sa Philippine Disaster Risk Reduction and Management Act ug sa Philippine Climate Change Adaption Act. Ang mga mosalmot niini mga pinili sa matag lungsod kinsa kasaligang mo-lecture sa ilang mga konstituwente sa kabarangayan bahin sa ilang makat-onan ning maong training.

Kay sa maong kurso sa pagbansay itudlo ang   kaalam kalabot sa First Aid, Basic Life Support, Safe Emergency Transport, High Rise Building Earthquake Evacuation and Rescue.

Ang mga resource persons o mamumulong maggikan sa Department of Science and Technology (DOST), Department of Environment and Natural Resources (DENR) 7, Philippine Institute of Volcanology and Seismology (PHILVOLCS), ug usab Bureau of Fire Protection (BFP). Ang mga batid sa maong mga ahensya maoy moladlad sa mga teknik pinaagi sa video showing, lektura, workshops, group discussion, creative media scenario building demonstrations, reflective analysis ug usab critical simulation drills.

Gituohan sa DSWD nga pinaagi niini dili kaayo daghang kinabuhi nga maangin sa panahon nga may katalagman nga moabot sa palibot sa Sugbo ug sa tibuok rehiyon sa Central Visayas. (BANAT NEWS)