3 ka tawo gipanunggab angol

CEBU, Philippines - Tulo ka tawo ang gipanunggab angol sa managlahing lugar ning lalawigan kagahapon sa kaadlawon ug sa miaging gabii.

Ang mga biktima mao sila si Vincent Pocong, Vernil Matimatico, tag- 20 anyos ug ulitawo nga managsiligan sa sitio Pooc, barangay Poblacion West sa lungsod sa Moalboal ug Marlon Dignos, 32, ulitawo usab nga taga barangay Gun-ob, dakbayan sa Lapulapu.

Sila si Pocong ug Matimatico gidunggab sa suspek nga si Juelmar dela Cerna alyas Kaohsiung, 21, ulitawo nga taga Panagsama beach sa barangay Basdiot, sa maong lungsod, kagahapon sa alas 2:50 sa kaadlawon sulod sa usa ka bar sa nahisgutang beach resort, samtang ang miluba usab kang Dignos giila nga si Ruben Manzano, didto sa sitio Cadulang Marigondon, dakbayan sa Lapulapu sa miaging gabii.

Si PO2 Romeo Legaspi Jr., sa Moalboal Police Station mibutyag sa Banat News nga sila si Pocong ug Matimatico nag-inom sa usa ka lamesa ug sa atbang nilang lamesa didto usab ang grupo sa suspek nga si dela Cerna.                

Midugang si PO2 Legaspi nga dihang nangalasbag ang duha ka grupo nagpasingitay na og estorya nga misangpot sa lamok-lamok nga sinumbagay sulod sa bar ug ang suspek nga may giluklok nga kutsilyo miduslak dayon niini ngadto sa mga suspetsado.

Si Pocong samdan sa ulo samtang si Matimatico samdan usab sa walang kamot.

Samtang gihatud dayon sa mga tagtungod ang mga biktima sa tambalanan sa dakbayan sa Sugbo nasikop usab dayon sa kapolisan ang suspetsado nga nagtingkagol na karon sa prisohan sa kapolisan sa Moalboal.

Samtang si Dignos naglakaw paingon sa balay sa iyang maguwang sa sitio Cadulang, Marigondon dihang nasugatan kini sa suspetsado ug human mopasingit og estorya milanit sa iyang kutsilyo ug gihansakan ang biktima sa dughan ug sa duha ka bukton.

Nahilandig ang biktima sa Vicente Sotto Memorial Medical Center sa dakbayan sa Sugbo samtang gipangita pa sa kapolisan ang suspetsado. (/WC)(BANAT NEWS)