Pag-umangkon ug opisyal gitipi

CEBU, Philippines - Patay ang pag-umangkon sa kanhi hepe sa Talisay City Police Office samtang naangol ang kauban niini atol sa pagpamusil niadtong Sabado sa gabii sa barangay Lawaan III sa dakbayan sa Talisay.

Patay nang nadangat sa Minglanilla District Hospital si Rolie Cueva, 26, sales clerk sa Cebu Atlantic Hardware nga nahimutang sa barangay Bulacao, Talisay nga pag-umangkon ni Supt. Audie Villacin kinsa nadestino na sa Police Regional Office (PRO)-7.

Si Cueva nakaangkon og mga samad pinusilan sa ulo, tangkugo, buko-buko ug tiyan samtang naangol ang kauban niining si Jun Cris Quiroga nga naigo sa tuong abaga ug naa karon sa Vicente Sotto Memorial Medical Center.

Si Quiroga gwardiya sa gitrabahoan ni Cueva ug padulong ang duha nga mamista.

Usa sa tulo ka mga namusil giilang si Joridine Ababon, 19, taga Lawaan III ug giingong nalambigit sa mga insidente sa uban pang pagpamusil diha sa Talisay sumala pa sa kapolisan.

Si SPO1 Mikie Espina kinsa usa sa mga miresponde nga nahinabi sa Banat News kagahapon mibutyag nga love triangle ang usa sa ilang gitutokang motibo sa maong pagpamusil.

Si Cueva giingong nakauyab kini og kauban sa trabaho apan ang maong babaye gikatahong dunay laing uyab nga una pa sa biktima nga migawas sa imbestigasyon nga nanghulga kang Cueva nga may dautang mahitabo niini.

Ang karibal ni Cueva padayon pang gisusi sa kapolisan.

Sumala pa ni Espina dihay higayon nga giatangan pa si Cueva sa paggawas niini sa ilang trabahoan sa kanhi uyab sa iyang uyab nga dunay kaubang mga lalaki ug gitamparos siya niini.

Dugang pa ni Espina tungod sa maong pagpanghulga mibalhin og puyo Cueva gikan sa barangay Pardo, dakbayan sa Sugbo ngadto na sa barangay Cansojong, Talisay apan gisundan gihapon kini sa karibal.

Si Cueva, Quiroga ug ilang merchandiser nga si Delre Ortega, 33, sakay sa usa ka motorsiklo paingon ngadto sa barangay Lipata, lungsod sa Minglanilla aron mamista sa ilang higala.

Ang motorsiklo iya ni Cueva apan si Ortega ang nagmaneho niini niadtong higayon ug angkas sila si Quiroga ug si Cueva maoy diha sa labing ulahi.

Tulo ka mga lalaking sakay usab og motorsiklo ang kalit lang mitungha ug ang usa ka angkas niini ang mipusil ngadto sa mga biktima dayon sibat.

Matud ni Espina nga usa sa mga saksi sa hitabo ang mitudlo kang Ababon sa hulagway niini sa police rogues gallery nga maoy namusil nga giingong wala magtabon sa iyang nawong.

Ang mga suspek padayon pang gipangita sa mga polis hangtud karon. (BANAT NEWS)