CEBU, Philippines - Naangol human mabuslot ang apapangig sa usa ka ulitawo nga nasabak sa bala sa mipusil kaniya didto sa sitio San Roque sa barangay Basak, dakbayan sa Lapulapu sa miaging gabii.
Ang biktima mao si Marcos Abeljer, 23, ulitawo, nga nagpuyo sa maong dapit. Si PO2 Winston Ybanez sa kapolisan sa homicide sa maong dakbayan mibutyag sa Banat News nga nagbarog lang ang biktima sa gawas sa ilang balay dihang kalit lang mitumaw ang wala hiilhing kriminal.
Matud pa ni PO2 Winston Ybanez nga giduol niini ang biktima ug kalit kining gipusil ug ang bala sa armas nga wala hisayri ang kalibre didto moigo sa walang apapangig sa biktima.
Gihatud dayon sa mga tagtungod ang biktima ngadto sa Mactan Doctor Hospital sa maong dakbayan apan gibalhin kini sa Vicente Sotto Memorial Medical Center sa dakbayan sa Sugbo.
Sa pagkakaron padayon pang gipangita sa kapolisan ang kriminal. - BANAT NEWS