Managsoong Indian natulisa'g P15 mil

CEBU, Philippines - Nasakiyo sa wala hiilhing mga tulisan ang P15 mil nga koleksyon  sa duha ka mga magsuon nga Indian national nga tigpatanto didto sa barangay Guimbuangan lungsod sa Barili niadtong Biyernes sa hapon.

Ang mga biktima mao sila si Harjinder Singh, 42 , minyo, nagpuyo sa barangay Liba-ong lungsod sa Dumanjug, ug ang iyang manghud nga si Harpreet Singh, 22 , ulitawo , nga pulos mga Indian national.

Matud ni PO1 Richard Cababat, desk officer sa Barili Police Station nga ang mga biktima nagsakay og motorsiklo paingon sa lungsod sa Dumanjug aron maningil sa ilang mga customer nga utangan. Apan sa ilang pag-abot sa maong lugar kalit lang mi-overtake kanila ang motorsiklo nga gisakyan sa mga tulisan nga may plakang 7TC-02176 kinsa nagsul-ob og sirado kaayong helmet ug gibukotan pa og panapton ang ilang mga  dagway, dayon mihunong kini ug sa pagkanaog sa angkas, milanit kini sa armas dayong tion ngadto sa mga biktima uban sa pagdeklarar nga tulis.

Sa kabalaka nga pamusilon sila gihatag sa mga biktima ang bag nga gisudlan sa ilang koleksyon nga P15 mil ug dihang nadawat kini misirit dayon ang mga tulisan paingon sa Barili. Padayon pang gipangita sa kapolisan ang mga tulisan.    - BANAT NEWS