Drayber gitulis gipatay

CEBU, Philippines - Naglunang sa kaugalingong dugo ang usa ka habal-habal drayber human kini gitulis ug gipusil patay sa duha ka tulisan pasado alas-3 sa kaadlawon kagahapon diha sa dalan Sabellano sa barangay Quiot dakbayan sa Sugbo.

Ang biktima nailhan nga si Vergilio Limpio Jr., 25, taga San Agustin Village sa barangay Inayawan kinsa gipusil sa ulo ug namatay dihadiha.Sa pasiunang imbestigasyon sa kapolisan nasayran nga nakit-an ang biktima nga adunay duha ka lalaking pasahero padulong sa maong lugar.

Dangtan pipila ka minutos nadungog na lang ang buto sa armas ug dihang napalgan ang biktima naglunang na kini sa dugo diha sa daplin sa dalan ug wala na ang motorsiklo, mga alahas nga silver, class ring ug kinitaan sa biktima.

Gibana-banang mokabat dul-an P60 mil ang nakuha sa mga tulisan gikan sa biktima. Ang kapolisan padayun pa sa paghipos og dugang impormasyon ug mga saksi nga mobarog aron matumbok ang mga tulisan.   - BANAT NEWS