Suspek sa carnapping sikop

CEBU, Philippines - Usa ka lalaking gilambigit sa carnapping didto sa Luzon ang gidakop sa mga sakop sa Highway Patrol Group (HPG) niadtong Martes pinasikad sa warrant of arrest diha sa usa ka establisamento sa dalan Ranudo sa barangay Cogon-Ramos ning dakbayan.

Human sa pagkasikop kang Jovel Entote, 43, usa ka Honda Jazz nga may plakang JZN-100 nga gikatahong gimaneho sa drayber ni Entote ang na-flag down sa usa sa mga dalan dinhi sa Sugbu nga nahibaw-ang ang plaka iya sa Hi-Ace Van.

Tungod niini, ang HPG mironda sa panimalay niini sa Saint Michael Village barangay Banilad ning siyudad nga miresulta sa pagkakuha sa usa ka pulang BMW nga walay plaka.

Kagahapon usab, usa ka puti nga BMW nga adunay plakang NQI-707 nga gi-park sa establisamento diin siya madakpi ang gikuha sa HPG giingong gi-park kini sa anak ni Entote, matud pa sa HPG.

Ang abogado sa HPG nga si Atty. Edwin Angay mipasabot nga ang warrant of arrest ni Entote gikan sa sala ni Regional Trial Court Branch 92 Presiding Judge Eleuterio Bathan sa Quezon City kasong Qualified Carnapping labot sa nahitabong carnapping niadtong Abril 29 tuig 2009.

Sumala pa sa HPG report, niadtong Abril 29, 2009 adunay nahitabong carnaping sa Katipunan Ave. CP Garcia barangay Pansol, Quezon City diin usa ka Toyota Hi-Ace Grandia nga adunay plakang ZPZ-463 pugsanong gikuha ug gipatay ang drayber nga si Rodolfo Petalino sa duha ka carnappers.

Na-recover sa HPG ang maong sakyanan niadtong Oktobre 28 , 2011 sa Bacolod City nga aduna nay na peke nga plakang NKB-111 nga gipanag-iya sa NKB Lending Corporation. Ang tag-iya sa NKB Lending Corporation mipagawas og affidavit nga ang maong sakyanan iyang napalit gikan ni Entote.

 Sumala pa ni Angay ang HPG Intelligence Division nakadawat og impormasyon niadtong Martes nga si Entote diha sa maong establisamento hinungdan sa pagkasikop niini.

Ang HPG mikuha dayon og search warrant sa sala ni Regional Trial Court Branch 9 Judge Alexander Acosta tungod sa pagdudang dunay mga plaka sa mga sakyanan nga alang sa ubang matang sa sakyanan nga gihipos diha sa panimalay ni Entote nga kalapasan sa Section 3 sa RA 6539 o Anti-Carnapping Act of 1972 ug Batas Pambansa 43.

Sumala pa ni Angay nga ila karong sutaon ang mga dokumento sa mga sakyanan nga nakuha gikan ni Entote nga mao ang usa ka pula nga BMW nga walay plaka, ang Honda Jazz ug ang ikaduhang BMW nga puti. Apan sa pasiuna nilang pagsusi migawas nga ang plakang NQI-707 sa BMW nakarehistro sa usa ka Toyota Corolla Sedan nga gipanag-iya sa usa ka Josefina Reyes nga taga Bonifacio, Manila.

Ang HPG gikatakdang mohimo og macro-etching sa mga serial numbers sa chassis ug engine sa maong mga sakyanan pagtino kung gi-tamper ba kini ug si kinsa gyud ang mga tag-iya niini.

Gisubay usab sa HPG kung sakop ba sa carnapping syndicate sa Luzon si Entote. Si Entote wala kakuhai og pamahayag sa mga sakop sa media bahin sa alegasyon sa HPG apan ang abogado niini nga si Atty. Noel Archival miingon nga ilahang atubangon ang pasangil ngadto na sa korte.   - BANAT NEWS