Sa Kasaysayan Karon: Agosto 11

Beriberi

1858— Aksidenteng nadiskubrehan sa Dutch scientist, doktor ug hygienist nga si Christiaan Eijkman ang gikinahanglang bitamina sa tawo aron dili masakit og ‘beriberi.’ Si Eijkman nag-imbestigar sa maong sakit nga pagpanghupong ug grabeng pagpangluya sa mga tawo sa Dutch East Indies (Malayan peninsula). Niadtong 1886, namatikdan niyang ang mga manok sa ilang laboratoryo nga gilawgan og nilung-ag nga bugas manambok o daw manghupong og maayo nga susama sa tawong adunay beriberi ug lahi ra kung tibuok nga bugas humay ang ilang gikaon. Niadtong 1897 siya maoy miila nga ang pagpanghupong usa ka sakit ug tungod kini sa kakulang sa mga gikinahanglang bitamina ug sustansya sa pagkaon nga sa paglabay sa mga panahon mao ang thiamine, vitamin B1. Tungod sa iyang nadiskubrehan si Eijkman ug Sir Frederick Gowland Hopkins nga mihimo usab og susamang pagdukiduki sa maong sakit nagbahin sa Nobel Prize in Physiology ug Medicine niadtong 1929.

S.O.S.

1909—Ang barkong pasaheroan nga S.S. Arapahoe mao ang unang barko nga migamit sa radio distress call nga S.O.S.. Ang ilang radio operator nga si T. D. Haubner mi-radyo sa si bisan kinsang makadungog sa iyang frequency ug mipahibalong naputol ang ilang propeller shaft samtang sila naglawig sa kadagatan sa Cape Hatteras, North Carolina, USA. Ang tawag sa radio nasagap sa United Wireless station "HA"sa Hatteras ug sila napadad-an og tabang. Pipila ka bulan ang milabay, si  Haubner kinsa mao gihapoy radio operator sa S.S. Arapahoe nakadawat og SOS gikan sa barkong SS Iroquois, mao kini ang ikaduhang higayon nga nagamit ang SOS sa America. Kaniadto, ang distress code CQD maoy gigamit isip maritime distress call, nga gipaila og gihimong standard sa Marconi Wireless Telegraph Co. niadtong 1904. Apan human sa ikaduhang International Radio Telegraphic Convention (1906) giilisan kini og SOS tungod kay mas dali kining masabtan sa radio.