Purok system ipaila sa matag lungsod

CEBU, Philippines - Si Governor Gwendolyn Garcia kombinsido    nga ipaila niya kining Purok system sa tibuok lalawigan aron labing epektibo ang pagpatuman sa mga proyekto sa kagamhanan nga ikaayo sa matag panimalay. Kini human hisayri sa gobernador ang maayong resulta sa mga gimbuhaton sa kagamhanan sa matag barangay nga misagop sa Purok system. Si Mayor Ronakld Guaren sa lungsod sa Oslob maoy milakbit saysay sa iyang kasinatian sa pagpatuman niining Purok system ngadto sa gobernador.

Matud pa ni Guaren nga namatud-an na nila kini kay ang Oslob usa sa 19 ka lungsod sa lalawigan sa Sugbo nga misagop niining Purok, sa matag barangay.

Nagkanayon si Guaren nga pinaagi sa pagbahin-bahin sa barangay ngadto sa Purok-Purok, dali ra kaayo magkasinabot ang mga molupyo nga nahisakop sa usa ka purok sama pananglit sa pagpatuman sa pagpanghinlo sa ilang palibot ug sa paghakot sa ilang basura.

Sumala ni Guaren nga ang matag Purok naglangkob sa 100 ka panimalay ug matag usa ka sakop niini gitahasan nga mahimong responsabli sa paghinlo sa ilang palibot uban sa paghakot sa kaugalingon nilang basura ngadto sa basurahan sa lungsod.

Matud pa ni Guaren nga gumikan niini migaan ang mga gimbuhaton sa lungsod kay bisan ang sistema sa pagbahig sa basura dali kaayong naatiman sa mga hingtungdan tungod kay matag balay sa matag purok gitudloan sa hustong sistema sa pagbahig sa basura nga malata ug dili malata. Usa sa mga proyekto nga gipaila ni Guaren sa iyang lungsod pinaagi sa Purok, mao ang pagkinahanglan nga matag panimalay may kaugalingong pansayan ug nasuta niya ang kadasig sa tanan sa pagtuman sa ilang tagsa-tagsa ka obligasyon.

Nasuta ni Guaren nga gaan ra sa managsilingan ang pagtinabangay sa mga gimbuhaton tungod sa ilang kasibot sa pagtuman sa ilang kaakohan    kay anaa man sila sa usa ka purok. Gawas niini misamot ang kamalinawon sa matag Purok tungod kay kanunay man nga magkasandurot ang managsilingan tungod sa ilang mga kaakohan sa ilang purok.  - BANAT NEWS