CEBU, Philippines - Usa ka ulitawo kinsa giakusahang nanglugos og 12 anyos nga batang babaye nga iya ra usab nga ig-agaw nasikop sa kapolisan didto sa lungsod sa Sibonga sa miaging Huwebes sa hapon.
Ang suspek nga giila lang sa ngalang Juan, 18, nagpuyo sa usa sa mga barangay sa dakbayan sa Carcar.
Sila si SPO3 Arlene Banugon ug PO2 Jose Palmero sa Sibonga Police Station maoy misilbi sa warrant of arrest ngadto kang Juan dayon ila kining gisikop.
Si PO2 Arnold Frenal sa Sibonga Police Station mibutyag sa Banat News human nila madawat ang taho kalabot sa suspek nga misuroy sa Sibonga atol sa bisperas sa piyesta sa maong lugar milihok dayon sila ug giandam ang warrant of arrest batok niini.
Nasayran nga usa ka mahuyang nga paryente sa biktima ug suspek maoy misumbong sa mga polis hinungdan nga sayon ra kaayo kining nasikop.
Sumala sa rekord sa kapolisan, ang maong kaso nahitabo sa miagi pang tuig dihang 17 anyos pa ang nahisgutang suspetsado .
Apan wala kini hidakpi tungod kay milayas ug wala na magpakita sa maong lugar ug gituohan nila nga bag-o lang kining nahiuli sa ila.
Ang orden de aresto batok sa suspek giluwat ni Regional Trial Court (RTC) Branch 7 Judge Ester Veloso.
Hinuon gitugyan dayon sa kapolisan sa Carcar ang suspek diin kasamtangan kining gibalhug sa prisohan. - BANAT NEWS