CEBU, Philippines - Duha ka lalake ang gikatahong namatay sulod karong tuiga gumikan sa Acquired Immune Deficiency Syndrome (AIDS) dinhi sa dakbayan sa Sugbo.
Kini maoy gibutyag ni Cebu City epidemiologist Dr. Ilya Tac-an, kinsa misaysay nga moabot na usab og 116 ka kaso sa nataptan og Human Immuno Virus (HIV) nga sinugdanan sa sakit nga AIDS kung dili kini matambalan.
Ang maong rekord gibase sa rekord sa Cebu City Health Department gikan sa buwan sa Enero hangtud sa Hunyo karong tuiga.
Giawhag ni Tac-an ang mga publiko ilabi na niadtong dunay daghang kapares sa pakighilawas, mga drug users nga mogamit og syringes ug ang mga bayot nga kinahanglang magpa-eksamin na lang gyud sila aron masuta kung duna silay HIV.
“Kung duna sila’y ing-ana nga behavior , mas maayo nga modiretso sila og pa-examine. Aron ma-detect nato og sayo ang sakit,” tambag pa ni Tac-an. Sumala pa ni Tac-an nga subsob ang kampanya batok sa HIV aron kapugngan ang pagkuyanap niini. ( EIM) - BANAT NEWS