"Anomalya" nga nakapirma si Rama sa ordinansa gipasusi

CEBU, Philippines - Gipatun-an na ni Mayor Michael Rama kang Cebu City Administrator Jose Marie Poblete nga sutaon kinsay responsable nganong naapil sa mga gipirmahan ni Mayor Michael Rama ang ordinansa nga nagpugong sa mayor nga makabaligya og luna sa South Road Properties (SRP).

Si Rama misaway nang daan sa plano sa Konseho nga did-an ang iyang buhatan nga makabaligya og luna sa SRP tungod kay nagtuo ang mayor nga dili iya sa indibidwal o sa Konseho ang maong luna kay kini iya sa mga Sugbuanon nga maoy nagbayad sa buhis.

Sumala pa ni Poblete nga hugot gyud ang baruganan sa mayor ang pag-veto sa maong ordinansa. Kahinumduman nga nahimong kontrobersyal ang maong ordinansa sanglit giingong nalipat ang mayor ug napirmahan niini ang maong ordinansa bisan sa pagsupak niini.

Ang mayor misaysay nga mismo siya nakugang kung nganong naa ang iyang pirma sa maong ordinansa apan nagdumili hinuon siya pagpamasangil og tawo sa nahitabo.

Si Poblete gitahasan karong moimbestigar kung unsa gyuy nahitabo apan giklaro niini nga dili sila mobasol og laing tawo.

“Ang labing importante karon nga gi-veto na kini sa mayor,” sumala pa ni Poblete. Ang ordinansa wala magtugot sa mayor nga makabaligya og luna sa SRP kung dili mananghid sa Konseho.

Kahinumduman nga gisaway ni Bise Mayor Joy Augustus Young ang maong insidente ug misaysay kini nga nagpaila lang nga ang mayor nagpabaya gumikan kay wala kini kahibalo sa gipirmahan niini. - Sanden J. Anadia (BANAT NEWS)