Hot logs nasakmit sa TCPS

CEBU, Philippines - Sobra sa 300 ka mga tablon sa nagkalainlaing kahoy sama sa Mahogany, Lawaan ug Bayong ang gisakmit sa mga polis niadtong Martes sa gabii diha sa sitio Salvador, barangay Tanke, dakbayan sa Talisay.

Ang maong mga kahoy nga gitabunan og lona diha ma-recover sa mga polis sa likod sa balay sa magtiayong Rene ug Lea Mabanto sa nahisgutang lugar.

Ang kapolisan nakadawat og report kabahin sa giingong ilegal nga mga kahoy nga gibiyahe nga gidunggo diha sa sitio Salvador hinungdan sila si Inspector Hugo Rio Ipong, SPO4 Daniel Tarucan, PO3 Ferdinand Pablo, PO3 Benedicto Lasque, PO2 Aquiles Cabando, PO3 Raul Torregoza ang miresponde sa maong report.

Uban sa maong mga polis ang mga opisyal ug tanod diha sa barangay Tanke. Si Ipong nga nahinabi sa Banat News kagahapon nagkanayon nga ang maong mga kahoy giingong gipanag-iya kini sa gipanganlan og ‘Moly” nga taga barangay Tanke.

Matud niya nga nagpahigayon pa sila og imbestigasyon kung diin gikan ang maong mga kahoy ug kinsay nagdala niini diha sa maong lugar.

Una niini lima ka tablong kahoy ang nasakmit sa kapolisan niadtong Martes apan nakadawat sila og report nga duna pay kauban ang maong mga kahoy nga gitagoan diha sa likod sa balay sa magtiayong Mabanto.

Apan si Ipong nagkanayon nga ang magtiayon nangangkong wala sila makaila kinsay nagbutang og mga kahoy diha sa likod sa ilang balay.

Ang maong mga kahoy gitugyan na sa mga polis kagahapon sa buntag ngadto sa Provincial Environment and Natural Resources Office (PENRO). - Brenda D. Batuto ug Nestle L. Semilla, USJR/EIM (BANAT NEWS)